西意雙雄 必有犧牲者

猪拉多纳

前晚西班牙同意大利合演今屆歐國盃決賽周最高水準比賽，被睇低嘅意大利踢出爭氣波，遇上稍稍跌Watt嘅西班牙合演一場扣人心弦、精彩絕倫嘅好戲，不過Peter喺度可以大膽預測，兩軍於分組賽會有一隊成為犧牲者，無緣打入八強，皆因同組克羅地亞顯示非凡黑馬本色，出線形勢甚至比西意雙雄更為樂觀。

克羅地亞球員向來都有高超技術，如今在優秀教練比歷手中變得更加整體，以該隊實力，面對西意雙雄都有搶分能力，首仗大勝愛爾蘭除三分落袋外，亦佔盡得失球差便宜，就算到最後同分都有着數。至於慘敗嘅愛爾蘭只有兩個機會，就係冇機會同機會渺茫，老帥查帕東尼要為佢仍然倚重失敗中堅鄧尼付出代價，鄧尼既欠缺速度，鬥跳頂亦輸蝕畀人，轉身就更加嫌慢，三大弱點集一身，所以至成為英超著名嘅烏龍王，其實只要查帕東尼做多少少功課，都知道寧用新人都唔應該倚重佢，大家睇見今季阿士東維拉成績一落千丈，鄧尼絕對係其中一個失敗主因，愛爾蘭重用佢等同自殺。

回說今晚賽事，A組波蘭迎戰俄羅斯，俄羅斯雖然於首仗表現搶鏡，但東道主背城借一，首仗失分多少源於欠缺經驗，今晚再度出擊預期會有改進，面對和波都可以接愛既俄羅斯，主場受讓非常着數，Peter推介波蘭下盤。