喀麥隆開W賀主帥坐正

猪拉多纳

世界盃非洲區外圍賽第2圈第9組，今晚有場由「不屈雄獅」喀麥隆喺中立場突尼西亞火併利比亞。喀麥隆主帥拿華尼上周三先喺場內部鬥爭鍊贏名將米拿，同足總正式簽下合約，難得坐正，梗係會全力搏殺希望贏波慶祝吓。夠鬥志兼贏質素，安高梗係捧佢哋1.9倍客勝啦！（開賽時間：周一凌晨0:00）

喀麥隆足總內部混亂，拿華尼其實喺舊年10月已經接手國家隊，之後更曾造出6場不敗佳績，只係由於足總權力鬥爭激烈，以足總榮譽會長兼世盃名將米拿為首嘅派系一直反對聘用拿華尼，所以直至上星期，拿華尼幾乎係變相做義工，無名無分之下帶隊。不過，上星期米拿終於喺足總權力鬥爭戰敗，仲畀人踢出局，拿華尼亦隨即同國家隊補簽1年合約，宣布坐正，話晒都係歷史性一刻，班球員都唔會想失分搞到主帥尷尬啩？
伊度奧續內部停賽

當然，「不屈雄獅」今仗仲繼續有首席球星伊度奧內部停賽，不過佢哋實力喺非洲始終算頂班，上輪對住剛果民主共和國，最後憑祖普莫亭一箭定江山，依然可以全取3分。球隊今次派出26人大軍出征，預計上仗因傷倦勤嘅嘅中場艾安安奧同守將尼高拉斯尼古路都及時傷愈，強陣出擊，值得睇好。
利比亞失地利人和

另邊廂嘅利比亞，本來人腳同實力已經唔突出，最慘係佢哋仲要因為國內政局問題，被迫改去突尼西亞做主場，連地利都冇埋。更陰功係，突尼西亞主辦單位更因為保安問題，宣布今仗會閉門作賽，利比亞連地利同人和優勢都冇埋，今仗恐怕難逃一敗。

世盃外非洲區第9組
賽制：

現為第2圈，40隊分10組，採雙循環制，每組首名可進身下圈。