愛爾蘭冇力掃克

猪拉多纳

歐國盃C組另一隻「歐豬」愛爾蘭出籠對克羅地亞，今場焦點必屬雙方「忘年主帥」，73歲查帕東尼同43歲比歷大鬥法。老查食鹽多過比歷食飯，但唔代表有着數，皆因克羅地亞正係佢嘅大剋星，帶住已闊別大賽十年嘅愛爾蘭，未係打破宿命嘅時候，受讓平半都捧唔過，建議要克羅地亞上盤。（now632及660周一凌晨2時45分直播）

意大利名帥查帕東尼教練生涯喺八九十年度有過光輝日子，但近十幾年鬱鬱不得志，轉捩點就係○二年世界盃分組賽，由佢帶領嘅意大利佔上風情況下輸畀克羅地亞，意軍及後表現每況愈下。兩年後老查亦失意於歐國盃，令意大利分組賽出局。查帕東尼今屆率領愛爾蘭再戰歐國盃，面對「剋星」克羅地亞，多少有些心理陰影，好難有作為。

查帕東尼可能太緊張，上月集訓以來，安排緊密操練，但此舉似乎棋差一着，球員谷得太行已有怨言，日前更要求休息，令人擔心比賽腳軟。事實上，愛爾蘭本身亦有問題，後衞奧沙有傷，中堅李察鄧尼就係出名嘅「烏龍王」，防線唔多穩陣。

克羅地亞少帥有料到

克羅地亞主帥比歷教波成就備受認同，上屆歐國盃分組賽率領克軍擊敗德國，分組賽三戰全勝，成績遠勝老查。而且球隊人才濟濟，淨係今季表現大勇嘅謝拉域及莫迪歷，都足以反轉愛爾蘭。

基於克羅地亞之後要鬥兩大勁旅意大利同西班牙，如果今場贏唔到，都幾頭痕，勢必全力爭勝。
Head to Head

愛爾蘭與克羅地亞曾交手六次，當中有四次屬熱身賽，估不到愛爾蘭的戰績會較好，取得兩勝三和一負的成績。不過，兩軍在正式賽事交手僅得2000年歐國盃外圍賽，當時坐鎮主場的一方皆能勝出賽事；當屆外圍賽愛爾蘭以一分之差力壓克羅地亞取得附加賽資格，可惜於附加賽不敵對手出局，無緣出席當屆決賽周。