荷蘭狂鋒開「讓主」

猪拉多纳

今晚死亡之組B組另一場好戲，就係由捧盃熱門之一荷蘭對丹麥，今場「亨利」就揀咗荷蘭推介畀大家，為爭出線，實力超班嘅佢哋，睇怕點都唔會放過同組最削嘅丹麥，話唔定隨時嚟個大開殺戒添，2.52倍「讓球主勝」抵玩！（翡翠台、高清翡翠台、now632、630及100台、廣東體育、中央5台周日凌晨0:00直播）
尹佩斯孭飛士哥保證

「橙衣兵團」荷蘭歷來都係大賽常客，但講到捧盃，講嚟講去都仲講緊1988年，靠「三劍俠」雲巴士頓、古列治同列卡特贏咗嗰屆冠軍。數數手指都成廿幾年前嘅事，攞完嗰屆之後，雖然屆屆入到決賽周，但硬係冇冠軍命，叻極都只係殺到入4強。

不過，「亨利」今屆就好睇好佢哋前景，論人腳，佢哋嘅前鋒線應該係咁多隊當中最銳利嘅，尹佩斯今季喺阿仙奴腳風順到冇朋友，零角度、大車身嘅高難度入球，真係睇到都係打前鋒嘅「亨利」拍爛手掌、五體投地。仲有德甲神射手亨特拉爾，佢一入到禁區就係Show Time時候，今季喺史浩克04就多次話畀人知佢嘅捕位有幾耍家，禁區之內起到腳嘅話就多數有斬獲。
丹麥冇星難創奇迹

仲有荷甲射手、効力川迪嘅盧克迪莊，佢上季喺荷甲都省入25球，再加埋中場弗番嘅史奈達同「電兔」洛賓，荷蘭嘅攻擊力真係無得頂，唔愁冇波入，就算話後場會有馬菲臣因傷缺陣，要搵新仔華亞爾或老將保馬頂上都冇有怕啦！

牌面上丹麥係呢組最弱嗰隊，前線只靠阿仙奴棄將賓特拿孭飛，中場新星基斯甸艾歷臣雖然備受期待，但未經大賽考驗。球隊最出名係個大後備龍門卡斯柏舒米高，可惜佢都只係因父之名，想話重演老竇舒米高當年捧盃奇迹，睇怕好難。荷蘭為出線，今場肯定有殺錯、冇放過，「亨利」信火力強大嘅荷蘭，有力炒丹麥一鑊甘甘哋旗開得勝！
橫數千軍

荷蘭法定時間對賽不敗

‧自1967年後共8次對碰，從未於法定時間內負於丹麥腳下。

‧近25戰取得23勝，僅有敗仗包括世盃決賽不敵西班牙及外圍賽出線後負瑞典。

‧自1988年奪歐國盃後，每次參戰世盃或歐國盃均突破分組賽。

‧唯一一支喺近6次出戰歐國盃決賽周均能出線淘汰賽球隊。

‧喺外圍賽嘅傳球成功率高達90.2%，冠絕群雄。

丹麥鬥「橙軍」少波入

‧近6場正式比賽不敗，最後4場外圍賽分組賽全勝。

‧自1992年贏歐國盃後，3次殺入決賽周僅贏2仗。

‧對上5次對荷蘭僅入2球。

‧過往2次喺歐國盃交手，2000年荷蘭喺分組賽贏3:0，92年丹麥喺準決賽射贏12碼。

‧歷來同荷蘭28次交手僅贏6次。