德國變陣歎葡撻

猪拉多纳

死亡B組激戰爆發！今晚首輪交鋒即刻整場德國對葡萄牙嘅超級大戰，被視為奪標熱門嘅日耳曼兵團，除咗實力喺對手之上外，領隊勒夫仲安排好奇招，搵初任右閘嘅拿斯賓達去對付葡萄牙王牌C朗，擺明志在必得。況且佢哋剛宣布加碼20%獎金，士氣同質素贏晒，小讓平半1.77倍上盤夠晒穩陣。（now632台、廣東體育及中央5台周日凌晨2:45直播）
防線大執位 攔截要硬淨

被視為最有力推翻西班牙王朝嘅德國，雖然話之前熱身賽表現普通，但眾所周知佢哋係大賽球隊，嚟到決賽周打真軍，力奇絕對唔擔心佢哋嘅發揮。事實上，德國中前場星光熠熠，發電機「小豬」舒韋恩史迪加亦傷愈回歸，前線預計今季腳風大順嘅馬里奧高美斯可壓過老將高路斯擔正，不過無論搵邊個做箭頭，入波都唔成問題。

防線方面，除咗梅迪薩卡及時傷愈外，為咗守住全歐洲最強殺手C朗，德國早已做足工夫，領隊勒夫睇過晒C朗近期比賽片段後做好安排。參照拜仁之前喺歐聯搞掂皇馬，當時C朗對住德國隊長拿姆已一籌莫展，依家勒夫仲大膽到擺拿姆去左路對付拿尼，右路放棄埋紀律有問題嘅謝路美保定，改用喺練波串演右閘搶鏡嘅拿斯賓達，睇落真係信心十足。
德國加獎金 捧盃每人300萬

賽前德國球星普多斯基都公開提醒隊友，話防守C朗最緊要係攔截夠硬朗，同主動進逼對方，佢深信隊友有足夠質素頂住C朗，咪話力奇誇張，睇怕C朗今晚想冇傷冇痛離場都幾難。再加上德國剛宣布今屆賽事奪標獎金係每人30萬歐元（約300萬港元），足足比2010年世盃冠軍獎金25萬歐元多出20%，今晚佢哋落到場肯定打甩髀啦！

葡萄牙方面，熱身賽3場不勝持續不振，仲要係3戰只入得1球波，鋒力不濟，靠C朗單天保至尊嘅問題始終解決唔到，前線無論用普斯迪加定曉高艾美達都唔夠班，C朗師弟拿尼亦名大於實，唔多靠得住。

唔只進攻唔掂，最慘係佢哋防線同樣不濟，兩名長期主力卡維奴同保辛華因同領隊保羅賓圖唔妥冇入選。防線大執位後，雙閘荷奧彭利拿同法比奧干查奧都係漏洞多多，單睇佢哋喺外圍賽8戰失12球已經唔合格，今晚對住德國邊有運行吖！
橫數千軍

德國首場分組賽連開3口細

‧近8場得4勝2和2負，當中7次開大，其中有兩場更加係「其他」波膽。

‧近8場未嘗在上半場落後下反勝。

‧外圍賽10戰全勝，入34球，僅次於荷蘭嘅37球。

‧連續3屆分組賽首戰都開出「入球細」。

‧近10屆歐國盃有6次打入決賽，3次贏得冠軍。

葡萄牙C朗射門命中率冠外圍賽

‧近8場得3勝3和2負，其中5次開大，其餘3場均踢成0:0。

‧近4屆12場分組賽，得9勝1和2負。

‧C朗於外圍賽上陣8次入7球，有23次射門命中目標，為外圍賽中最多。

‧連續4屆分組賽首名出線。

‧5次打入決賽周，都成功進身淘汰賽。