智利彈起繼續上委

猪拉多纳

今日斯維跳出歐洲，去睇吓美洲波，明早有多場世盃南美洲區外圍賽，其中新勢力智利近況神勇，作客委內瑞拉都冇有怕，呢場開出平手盤，梗係捧智利。

（周日早上6時35分開賽）

委內瑞拉憑住穩健的防守，於今屆外圍賽異軍突起，現時暫居第四位，上仗作客落後情況下逼和勁旅烏拉圭，對於這支長期積弱的球隊來說，表現已相當不俗。不過，今場遇上智利就唔係咁講。

自南非世盃一鳴驚人後，智利已重新崛起，雖然「瘋子」教頭比爾沙離任多時，但他建構的骨幹依然冇變。以巴塞前鋒阿歷斯山齊士為重心，配合伊斯拿、維達爾、馬迪亞斯費南迪斯等外流球星，該隊攻力非常厲害，從上仗作客去到高原都能輕取玻利維亞，證明智利已非昔日吳下阿蒙，既然今場客軍唔使讓波咁筍，值得捧場。