卡塔爾僱傭兵玩殘太極虎

猪拉多纳

卡塔爾自從加入多名「僱傭兵」後，實力隨即大增，今晚喺世界盃亞洲區外圍賽十強賽A組主場迎戰南韓，絕對有力製造驚喜，受讓不妨捧1.83倍「讓球主勝」！（now671台周六凌晨0:15直播）

雖然卡塔爾投放大量資源喺足運，但本身人腳質素有限，為咗增強實力，佢哋不斷招攬喺當地聯賽搵食嘅南美洲同非洲球員入國家隊。經過多年嘅調整之後，卡塔爾喺今屆外圍賽終於步入收成期，上圈就力壓近年進步神速嘅巴林，以小組次名出線，主場更獲1勝2和，包括打和勁旅伊朗。日前卡塔爾喺十強賽首戰亦有個好開始，憑原籍烏拉圭嘅前鋒蘇利亞入波，作客贏黎巴嫩1:0，表現極之對辦。
南韓換血未見成效

南韓早前請得新帥崔康熙執教後，本來成績唔錯，一上任就取得兩連勝，不過近期卻大刀闊斧，放棄多名功臣，包括喺阿仙奴甚少上陣嘅王牌前鋒朴主永，仲喺日前對西班牙嘅熱身賽，改派孫弘民、池東沅同南泰希三大90後外流球員掛帥，結果最後大敗1:4，可見佢哋根本未有經驗應付國際級大賽，今晚對住愈戰愈勇嘅卡塔爾，實在唔似有運行。