希臘死守搶「客W」悶波揭幕戰

猪拉多纳

Yeah！！2012歐洲國家盃終於開波啦！今晚揭幕戰由主辦國之一波蘭，迎戰04年盟主希臘。波蘭坐擁主場之利，有國民打氣聲勢浩大，本來值得睇高一線，奈何對手希臘係防守專家，波蘭就算喺自己地頭都未必有着數，「亨利」今屆第一推，要希臘1.8倍「讓球客勝」！（翡翠台、高清翡翠台、now632、630及100、中央5台、廣東體育周六凌晨0:00直播）

「亨利」唔講大家都知波蘭係主辦國之一，主場出擊照計可以睇高啲，但睇番上屆歐國盃都係由歐洲二線尾嘅瑞士同奧地利合辦，但兩隊同樣係分組賽提早畢業，瑞士更喺揭幕戰就賴嘢輸咗畀捷克，唔多唔少都令「亨利」對今戰嘅波蘭有戒心。
波蘭國際賽戰績差

無錯，波蘭陣中有多蒙特3寶前鋒羅拔利雲度夫斯基、中場巴拉斯塞高斯基，同右閘比薛斯基孭飛，但佢哋大賽成績其實堅普通，上屆歷史性打入決賽周，作為新紮師兄成績唔好預咗，但估唔到只得1和2負要包艇咁可憐囉！
希臘外圍賽10戰不敗

之後世盃外圍賽佢哋同組只係北愛爾蘭、聖馬力諾之流，結果亦只係好過聖馬力諾少少排尾二。今屆以東道主身份直入決賽周，連外圍賽嘅磨練都冇埋，真係撐唔落喎！就算之前熱身賽踢得唔錯咁又點，話明熱身賽，畀你贏10場好唔好？今場首度亮相壓力自然大，好易出閘脫腳，「亨利」就覺得波蘭呢場發揮會打個七折喇！

客軍希臘出名守得，04歐國盃就係靠「平」穩出線、死守捧盃，今屆外圍賽佢哋表現醒神，7勝3和嘅不敗戰績，足以令大家重新留意佢哋，話晒近20場國際賽只輸過1場咁大把，今仗作客立下心腸去死守，保到不敗一啲都唔奇，「讓客」千祈唔好走雞。
鬥踢穩陣波捧角球細

另外，足智彩今場嘅特別項目有角球大細，中位數9.5球。睇番希臘喺外圍賽10戰只得3場係錄得10個以上角球，7場係角球細，始終打穩守突擊嘅球隊，唔會太進取，撞正東道主波蘭首戰唔衰得，揭幕戰踢法會保守啲，今場2.05倍「角球細」有得諗。至於「波蘭會否反敗為勝？」，講真，畀希臘先開紀錄，佢哋最叻玩死守，波蘭邊有機會反勝吖！不過1.04倍「否」真係冇肉食，都係專心玩角球細算啦！
橫數千軍

 波蘭連續5場冇失波

‧近6次主場交手全勝，對上3次未失過波。

‧近8場取得6勝1和1負，已連續5場、長達461分鐘未失過波。

‧08年首次參加歐國盃，分組賽未嘗1勝出局。

‧今場為領隊史梅達上任後首場大賽。

‧隊中有12名球員未踢過大賽。

‧上屆歐國盃係波蘭唯一一次打入決賽周，不過3場分組賽都贏唔到（1和2負）。

 希臘外圍賽保不敗

‧近8場3勝4和1負，場場都有波入。

‧今場為領隊費蘭度山度士上任後首場大賽。

‧世界排名14，比排第65位嘅波蘭高51位。

‧首次在外圍賽以不敗姿態晉級決賽周。

‧加拉高尼斯只差3場就成為國家隊史上上陣次數最多球員之一。

‧除04年成功奪冠，其餘2次參與歐國盃都分組賽止步。
亨利推介：

希臘（讓球客勝）