喜鵲變鐵雞啄爆愛沙

猪拉多纳

「高盧雄雞」靠「喜鵲」打天下！法國喺領隊白蘭斯接掌後重拾勁旅本色，近期寫下20場不敗佳績，今屆歐國盃更重召紐卡素弗爆中場賓艾化，同列貝利及賓施馬組成超級攻擊鐵三角。今晚佢哋喺勒芒主場迎戰疲兵愛沙尼亞，踢歐國盃前最後一場熱身賽，呢隻「不敗鐵雞」絕對有力大捷壯行色，1.42倍「讓球主勝」咪走雞呀！（now714台周三凌晨3:00直播）
法國白蘭斯接手20場不敗

法國上場熱身賽以2:0輕取塞爾維亞，喺主帥白蘭斯接手後愈踢愈好，至今已累積20場不敗！事實上，佢今次點兵搵嚟今季喺紐卡素踢到曉飛嘅賓艾化入伍，要知道呢位天才中場喺里昂同馬賽時期嘅演出已贏盡讚賞，只因脾氣同傷患問題未能上位，依家難得有機會喺國際賽大展拳腳，點會唔搏命吖？所以佢上場後備入替後表現搶鏡，消息話白蘭斯打算喺決賽周畀佢打正選，有佢同列貝利同賓施馬攻堅，入波易如反掌。
愛沙尼亞10日5戰攰爆

再者，法國賽前仲有個好消息，上仗勇戰足踝受傷嘅馬維拿，前日做完磁力共振檢查後，證實傷勢只係「普通嚴重」，但就唔算複雜，雖然分組賽首戰對英格蘭上陣機會渺茫，但仲有機會趕及第2仗鬥烏克蘭，白蘭斯總算放下心頭大石。

另邊廂嘅愛沙尼亞，啱啱踢完個波羅的海盃，準決賽輸畀芬蘭後，季軍戰叫做贏番立陶宛攞個安慰獎。只係佢哋本身實力已經唔突出，仲要由上周日起到依家，10日內已踢5場波，真係鐵人都頂唔順啦！既然法國踢埋今場就啟程去烏克蘭嘅涅茨克州準備決賽周，照計都唔想不敗走勢斷纜咁唔老利，鬥心同實力贏晒要大捷有幾難？
橫數千軍

 法國2012年3戰全勝

‧近20場不敗，共取得14勝6和。

‧2012年3戰全勝，共入7球失3球。

 愛沙尼亞近戰多失波

‧自5月27日起8日內4戰得1勝3和，入3球失9球。

‧近8戰6場有失波，當中全數為上半場所失。