法國炒愛沙尼亞壯行色

猪拉多纳

幾支奪標熱門例如荷蘭、英格蘭、西班牙於出戰決賽周前最後一場熱身賽都贏波，相信法國亦唔會例外，今晚於勒芒主場迎戰弱旅愛沙尼亞屬大炒格，法國讓波之下波童照捧「讓球主勝」。（now 714周三凌晨3時直播）

距離決賽周開幕不足一星期，各路大軍備戰亦已進入最後階段，雖然英格蘭、西班牙最後一場熱身賽贏波都有點拖泥帶水，不過前者受到傷兵問題困擾、後者大部分主力都冇踢足全場，小勝情有可原。

睇番法國經過對上兩場熱身賽，正選陣容已有初稿，前線相信會以賓施馬擔任單箭頭，列貝利、拿斯尼、文尼斯負責後上支援，無論今仗領隊白蘭斯強陣出擊、抑或派出副選如基奧特、華布拿等考驗實力，法國球員戰意都有一定保證，隨時好似荷蘭咁大炒一場壯聲威。
愛軍防線穿窿

愛沙尼亞自上月尾開始，差唔多每隔兩日就踢一場熱身賽，體力消耗已比對手大，而且早前對住另外兩支決賽周隊伍克羅地亞及烏克蘭都大敗而回，兩場合共失七球，守將好似紙板公仔咁脆弱，今次作客鬥連續二十場國際賽不敗嘅法國恐怕凶多吉少。