意大利挽面子 糟質俄羅斯

猪拉多纳

今晚意大利同俄羅斯合演歐國盃前哨戰，小妹就睇好「藍衫軍」多啲，雖然佢哋受到新一輪假波風暴困擾，但「國難」當前，話唔定可以令佢哋更團結，反而俄羅斯嚟到大戰前夕仲未培養好情緒，2.1倍主勝穩陣。（now630及632台、廣東體育周六凌晨2:45直播）

意大利近排嘅運氣的確麻麻，國內聯賽再爆出驚天假波風暴，部分國腳涉案已經唔在講，連上場對盧森堡場熱身賽都因為國內地震取消埋，備戰工夫波折重重。不過睇番佢哋喺1982年同埋2006年面對類似處境，都成功贏到世界盃，相信今次都可以喺逆境中反彈，為球迷踢場爭氣波，而且中場有派路、馬治斯奧同迪羅斯幾員猛將，今屆嘅意大利絕對不容小覷。
俄軍未進入作戰情緒

俄羅斯前幾日喺熱身賽對立陶宛，唔知係咪賽場隔籬嘅日內瓦湖靚得滯，搞到俄軍掛住睇風景踢到懶懶閒，就算出盡艾沙維及基沙哥夫等主力都製造唔到咩入球機會，最後互交白卷，小妹真係好失望！就算新帥艾禾卡特話只當係練習賽，都實在好難接受咁嘅表現，枉佢仲豪言歐國盃嘅目標係超越前任領隊希丁克入4強嘅成就，要打入決賽咁話，小妹真係唔敢睇好囉！今場對意大利，未必保得住10場不敗身喇。