丹麥強陣玩殘巴西二線兵

猪拉多纳

歐國盃列強嘅備戰工夫正進行得如火如荼，雖然丹麥嘅晉級機會被睇得極淡，但佢哋今晚喺熱身賽對住「巴西二線兵」，仍有力憑大賽前夕嘅旺盛鬥志贏波，小妹一於扒冷博４倍主勝！（now632台及廣東體育周六晚9:30直播）

其實丹麥喺歐國盃外圍賽嘅成績唔錯，8戰得6勝1和1負，仲壓過葡萄牙以首名出線添！論人腳亦絕對唔曳，除咗老將蘇連遜、鐵衞丹尼爾艾格同卡積亞外，仲有阿積士嘅基斯甸艾歷臣壓陣，加上丹麥想盡快操起狀態踢歐國盃，肯定比拉雜成軍嘅巴西有誠意得多，憑氣勢贏波絕無問題。
尼馬 甘素免役

巴西新星尼馬要踢南美自由盃而獲准免役，甘素亦要做手術退隊，佢哋之前就算齊腳都唔多識入波，家陣前線仲得番侯克同埋冇狀態嘅柏圖，又點攻得入丹麥？咁都未算，領隊文奴文尼斯竟然補選咗拉菲爾達施華頂替受傷嘅丹尼爾，級數差一大截，巴西條防線今鋪真係有排忙喇。

猪拉多纳