英格蘭細途險惡

猪拉多纳

英格蘭新帥鶴臣周日凌晨首度領軍作客挪威，唔少球迷憧憬英軍有新帥效應，但鶴臣剛於本周先同大軍第一次接觸，操得三幾課就要踢呢場波，幾位踢完歐聯決賽嘅車路士兵未歸隊，更有朗尼及柏加等大將唔出得，殘陣征戰熱身賽，志在練兵兼試陣，預期入波唔多，捧細！（now 632周日凌晨2時45分直播）

鶴臣收咧後離開西布朗履行英格蘭主帥之職，直到本周至首度召集兵馬正式展開歐國盃備戰工作，雖然隊內球員個個熟口熟面，但仍需時間落手落腳摸熟各人特性，並非一朝一夕做到。
車仔兵未歸隊

何況現時英軍根本唔齊腳，泰利、艾殊利高爾、加利卡希爾同林柏特等車路士戰將踢完歐聯決賽獲特赦遲啲歸隊，加上多位球星養傷，今次備戰作用有限，叫做畀剩低班球員磨合吓，相信英軍好難踢出流暢悅目進攻。

挪威以幾位英超兵做骨幹，當中以中堅軒治蘭特最夠卡士，呢個守將好頂得，唔怕安祖卡路爾，至於兩個左腳仔懷斯及摩頓柏達臣鬥慣班英格蘭球星，經驗老到，亦係今次「抗英」主力。不過，隊中射手侯錫納普同艾度拿奧爾質素平庸，挪威想靠生波組織攻勢唔容易，都係希望趁角球或死球亂衝亂撞博一博，橫計掂計，今場入波都唔慌多，捧細！