歐國盃：洛賓慘成德國公敵

猪拉多纳

歐國盃3大熱門之一荷蘭，備戰第一擊慘遇滑鐵盧。荷蘭尋日喺熱身賽對住以德國國腳為骨幹嘅拜仁，作客2:3慘敗呢場「死亡之組前哨戰」，焦點人物洛賓倒戈更遭德國球迷瘋狂侮辱。荷蘭將帥賽後立即煽動「小飛俠」報復，史奈達更準備幫洛賓搭路過檔國米！

荷蘭同德國向來係球壇宿敵，今屆歐國盃更齊被抽入「死亡B組」，不過荷蘭足總兩年前已經同拜仁傾好，會踢呢場熱身賽作為洛賓喺2010世盃重傷嘅賠償，結果造就呢場尷尬「預演」出現。最慘係洛賓幾日前做咗拜仁罪人，國仇家恨令「小飛俠」變成德國球迷眾矢之的。
拜仁躉噓爆 道歉都冇用

拜仁今場有湯馬士梅拿、拿姆、畢斯杜巴、馬里奧高美斯、卻奧斯同謝路美保定等德國國腳壓陣，果然卻奧斯17分鐘就以一記世界波轟破荷蘭大門，「橙軍」雖由亨特拉爾同盧斯安奴拿辛格入波反超前，但拜仁再由尼斯彼德臣以及另一德國國腳馬里奧高美斯建功贏3:2。

荷蘭輸波之餘，最慘係情緒低落嘅洛賓再受打擊，雖然佢只喺最後15分鐘上陣，但全場被拜仁球迷柴台，搞到佢坐喺後備席都黑晒面，後備落場嗰陣更有排山倒海嘅噓聲「歡迎」。洛賓喺短短嘅比賽時間內冇乜表現，完場後拒絕所有傳媒採訪匆匆離開球場，即使賽後有唔少球迷向拜仁道歉，都氹唔番呢位荷蘭球星。
史奈達幫手搭路過國米

眼見王牌球星洛賓受辱，荷蘭將帥賽後齊齊呼籲「小飛俠」作反，曾經効力拜仁嘅雲邦美就最激進：「佢喺拜仁踢咗5年，德國球迷點可以咁對佢哋嘅球星？如果我係洛賓，肯定唔會再為拜仁上陣！」荷蘭領隊雲馬維克亦話：「球迷嘅反應簡直係恥辱，點可以咁樣對待自己人。」

據報洛賓老友史奈達更親自搭路，幫呢位翼鋒今夏過檔國米：「球迷咁嘅行為實在太醜陋，我願意協助洛賓加盟國米，事實上國米都好需要佢。」據意大利《全市場》爆料，國米已決定簽入兩名進攻好手，目標包括拿維斯、莫路沙拉迪同洛賓，估計洛賓轉會費高達3,000萬歐元。

賽果熱線：2707 9900

6時止周五凌晨3時20分起至晚6時止