歐洲盃：希臘天兵 為國民而戰

猪拉多纳

「天神」宙斯、「太陽神」阿波羅、「智慧女神」雅典娜……Katie自細就迷戀希臘呢個神話國度。04年歐國盃，Katie見證住希臘神蹟，以弱旅姿態技壓群雄奪標。今屆佢哋喺新領隊費蘭度山度士帶領下，同樣具備「神力」，以佢哋分組賽不敗嘅實力，隨時可以殺入4強，甚至再造神話，帶領希臘國民走出政治同經濟嘅陰霾！

咪以為Katie睇神話故事睇得太多，就亂撐希臘，其實呢支04年歐國盃冠軍喺今屆外圍賽係5支不敗出線嘅球隊之一，絕對係真材實料。或者你會認為，希臘陣中冇乜世界級球星，踢嚟踢去都仲係加拉高尼斯、基卡斯同森馬拉斯等舊臣，但其實呢幾位「天兵猛將」各具神力，只要齊集埋一齊，威力絕對唔講得笑o架。
外圍賽不敗出線

事實上，經過08年歐國盃同10年世盃嘅失意，希臘亦進入「後奧圖大帝時代」，利赫高掛冠、轉為由費蘭度山度士接手。費蘭度山度士係葡萄牙籍教頭，佢大膽提拔新人同注重戰術嘅概念，打造出一線強隊希臘，佢曾經話過：「如果我哋陣中有美斯，根本唔需要講戰術，佢一個踢晒就得；但依家冇吖嘛，大家惟有遵照戰術安排，先可以踢出最佳水準。」
新帥接手僅失5球

的確，自費蘭度山度士接手後，希臘近18戰豪取10勝7和1負佳績。球隊穩中求勝嘅踢法，喺外圍賽10戰入14球雖唔算標青，但僅失5球就令對手冇晒計。士氣高昂、上下一心就係Katie認識嘅希臘，佢哋一眾球員仲誓晒師咁承諾會踢出最好嘅足球，祈求將希望帶畀正面對經濟及政治危機嘅希臘國民。我信神話，亦期待住全新嘅神話故事會喺今屆歐國盃上演。
希臘國家隊起底

首都：雅典

人口：1,130萬

領隊：費蘭度山度士

出席歐國盃次數：3次（80、04、08）

上屆成績：分組賽

最佳成績：冠軍（04）

小組首名賠率：5.3倍（A組）

冠軍賠率：80倍

賠率來源：足智彩