山度士殺戮「沙」場

猪拉多纳

歐洲各大聯賽已經曲終人散，如果各位悶悶哋又想睇好波嘅話，不妨留意吓聽朝巴甲勁旅山度士迎戰阿甲球會沙士菲嘅南美自由盃8強大戰啦！山度士首回合雖然落後1球，不過今次返到自己地頭絕對惡得起，讓半一1.88倍「上盤」都值得一博㗎！（有線61及201、廣東體育周五早上7:00直播）

衞冕冠軍山度士首回合作客沙士菲雖然落後1球，不過正因為咁令佢哋今場必須放膽去攻，唔會再好似上場咁踢到患得患失，山度士教練拉馬奴都話：「我哋需要踢番一貫嘅進攻足球，因為我哋已經冇其他選擇喇！」只要可以踢出自己風格，小妹相信佢哋有力贏波。
沙士菲主力高施路倦勤

山度士喺自己地頭已經連贏13場，近4次主場自由盃起碼淨勝2球，上仗對玻利瓦爾更加狂炒8蛋之多！主力尼馬喺整項賽事攻入7球兼列射手榜次席，雖然佢喺首回合遭沙士菲嚴密看管下表現麻麻，不過今次話晒有主場威力，小妹就睇好佢再發神威喇！

沙士菲僅得1球優勢喺手，中場奧古士圖費南迪斯就講明唔會掛住守，變相令山度士有更多機會入波，加上喺進攻同防守都舉足輕重嘅法蘭西斯高施路因傷缺陣，未必可以再度成功凍結尼馬同甘素，只要畀到空間佢哋發揮，山度士要收復失地絕對冇難度。

首回合：山客負0:1
自由盃及巴西盃賽制：

採主客兩回合淘汰制，今輪為8強次回合，若總比數相同，作客入球較多一隊晉級，再和則於次回合後隨即互射12碼決勝。