山度士打翻身仗

猪拉多纳

明早上演另外兩場南美自由盃八強次回合賽事，重頭戲當然係巴西同阿根廷球隊大戰，山度士主場對沙士菲。擁有尼馬等猛將助陣嘅山度士首回合作客輸○比一，但形勢未算太悲觀，事關呢支巴西老牌勁旅主場威力驚人，近十二次主場出擊全勝，其中十一次淨贏對手兩球或以上，Mic少睇好山度士可以反勝晉級，山軍讓波照捧「讓球主勝」。（有線61及201台周五早上7時直播）

其實山度士作客麻麻，今屆自由盃五場作客僅一勝，所以上次造訪阿根廷鬥沙士菲，僅輸一球並唔意外。最重要係佢哋今仗有地利，因為山度士今屆自由盃四次主場全勝，入十五球只失一球，簡直無懈可擊。若果計埋其他賽事，山度士近十二次主場贏晒，當中十一場淨贏兩球或以上，球隊上下都好有信心今仗能夠反敗為勝。
沙士菲保守攻力差

沙士菲弱點係攻力差，首回合僅把握少有嘅機會入波，憑穩健防守保住勝果，呢種保守踢法喺主場或者仲可以行得通，但去到巴西面對山度士球迷龐大聲勢，就未必頂得順。

Mic少認為山度士今場一定會搶攻圖盡快收復失地，沙士菲一旦早段失波，隨時兵敗如山倒，所以捧「讓球主勝」啱數。

另一場自由盃八強次回合賽事，智利大學主場對巴拉圭球隊利伯泰迪，雙方首回合打和一比一，「智大」有一粒作客入球在手，晉級形勢佔上風，可以睇定來踢。利伯泰迪比數上並非落後，贏一球都晉級，而且作客環境下亦唔敢推得太前，最重要係唔好再失波，預料雙方表現會比較謹慎，捧入球細。

（周五早上9時30分開賽）