修安聯鬥克魯 齊打守「細」波

猪拉多纳

克魯大丈夫話唔出就唔出，修安聯又驚輸多粒冇得追，球來球往好快個半鐘，呢場捧細！英乙升班附加賽準決賽次回合，第7位嘅克魯作客第4位嘅修安聯，克軍首回合贏1比0，今次必報鐵桶陣抗敵；修軍領隊話明今仗要先做好防務，細盤好路到震！

（周四凌晨2時45分開賽）
主隊驚輸唔敢冒進

英乙頭3名直接升班，第4至第7名打附加賽。首回合克魯1球小勝修安聯，修軍今次返自己地頭，領隊史杜洛克表示，首先唔好重蹈伯明翰覆轍。早前英冠附加賽，伯軍又係首回合輸一粒，返到主場就掛住進攻，半場多啲就畀對手入多兩粒KO，因此史帥話今場贏1比0係理想戰果。

落後一方都唔急，克魯當然樂得主守。克軍已連續17場不敗，後防穩陣硬淨係主因。佢哋明知整體實力較遜，預料會一守到尾，如此戰局入波唔慌多，捧細好路。