布力般戰意崩潰 韋根受讓抵玩

猪拉多纳

07/05/2012
文： 走肖

瀕臨降班被銀行趕絕，仲邊似有得救？布力般流浪今晚喺英超主場對韋根，當然想贏波燃點護級希望，但最近英國傳媒踢爆，現時布力般負債高達2,000萬鎊（約2.5億港元），而且同佢哋合作12年嘅巴克萊銀行決定斬纜，隨時搞到布力般戰意崩潰，讓平半要唔過。（有線200及300、廣東體育周二凌晨3：00直播）

結束12年合作關係

據講合作咗12年嘅巴克萊銀行飛起布力般，原因係佢哋今季借款已超過透支額1,000萬鎊（約1.25億港元），累計欠落成2.5億港紙，降班嘅話後果不堪設想。正因為咁，布力般印度班主準備向老家嘅銀行撲水，以解燃眉之急。但正所謂遠水不能救近火，巴克萊喺呢個時候宣布唔再合作，分明係睇死布力般降班翻唔到身，信專業分析咪掂主W。


事實上，布力般又真係爭唔落，近7戰僅得1勝6負輸到仆直，而且輸親例牌至少失兩粒。雖然話布力般今場有左閘馬田奧臣傷愈復出，但唔似會因為咁而重建豆腐防線。仲有吖，英國有消息話布力般球迷計劃踩入訓練場抗議，即使領隊堅恩死口唔認，但更衣室士氣直插谷底肯定係事實，諗唔到理由去撐。

韋根連續9場有波入

另邊廂嘅韋根近期連環打爆利物浦、曼聯、阿仙奴同紐卡素，教頭馬天尼斯仲當選埋英超4月最佳領隊，但其實韋根只係距離護級安全線3分，冇空間可以玩嘢鬆章，何況佢哋連續9場聯賽有波入，面對布力般好似玩泥沙咁嘅防線，絕對唔似會突然死火，受讓平半真係諗得過。