黑池伯明翰「大」手交易

猪拉多纳

04/05/2012
文： 朱楓

黑池同伯明翰兩支上季至由英超降班嘅球隊，估唔到相隔1年後，今晚又喺英冠升班附加賽4強首回合狹路相逢，可惜雙方今次只能活一隊。兩隊近況都勁到爆，加上黑池繼續娛樂性踢法，與其估邊隊贏，朱楓覺得今場個1.88倍入球大最抵玩！（now638台及廣東體育周六凌晨2：45直播）


黑池上季喺英超表現搶鏡，可惜最終因季尾失準而降班，好彩之後成功保留唔少骨幹，結果今季捲土重來喺英冠取得第5，有得玩附加賽爭重返英超。能夠Keep住繼續有成績，領隊荷路維絕對功不可沒。

黑池貫徹有前冇後踢法

其實家陣呢隊黑池同上季大家喺英超見嗰隊真係冇咩分別，踢法依然有前無後，今季喺英冠全季喪入79球喪失59球，當中西班牙中場安祖施維拿喺季尾仲大爆發，幫黑池喺季尾錄得7場不敗佳績，配合麥迪菲臘斯同湯馬士恩斯兩大新星，加上後備有超級射手菲臘斯，難怪門將基克斯賽前都話，喺升班附加賽，根本冇人想對佢哋。


同黑池一樣，伯明翰今季亦保留唔少打英超時嘅主力，季尾亦錄得9場不敗走勢以第4名衝線，好多人都歸功新加盟嘅領隊曉頓。雖然「阿伯」日前主場對雷丁有長人前鋒施積傷出，但其實佢今季已經唔係球隊必然正選，反而上場對雷丁先打後備嘅基斯布基先最大威脅。


伯明翰曉頓贏球員愛戴


賽前獲選為伯明翰本年度最佳球員嘅基斯布基，就大讚曉頓幫佢好多，喺更衣室好有威望，相信今晚重返正選陣容，必施展渾身解數報答對方，加上由熱刺外借嘅英格蘭超新星安祖斯唐辛近排愈踢愈勁，今晚作客黑池，絕對合演一場娛樂性十足嘅大騷！

橫數千軍

黑池為英冠大盤王

‧英冠大盤王，65%賽事開大。

‧聯賽主場13勝7和3負，勝率達57%。

伯明翰得3成客勝率

‧聯賽作客7勝，勝率僅30%。

‧近6次交手3勝1和2負，對上3次均開大。

英冠附加賽賽制：

聯賽第3名對第6名及第4名對第5名，採主客兩回合淘汰制，不設作客入球優惠，兩回合計打和將於次回合後加時作賽，再和則互射12碼決勝。