紅魔難大勝曼城上盤穩

猪拉多纳

03/05/2012
文： 阿水

英超爭霸峰迴路轉，早個月都仲話曼聯穩奪錦標，唔少莊家幾乎話要封盤咁滯，點知依家又話曼城贏出機會高，奪標賠率熱爆燈。阿水有艇仔老友爆料，話過去呢個月有唔少賭仔驚死補飛，買咗紅魔就補藍月亮，買咗曼城嘅就補曼聯。由於佢哋買親都係賠率低水嗰陣，莊家淨係執水都執唔少。

韋碧克收咧影響唔細

講番周日嘅英超賽事，家陣形勢下風嘅曼聯，嚟緊要喺主場迎戰史雲斯。話晒紅魔鬼唔只要贏波攞3分，同時仲要追得失球，所以莊家開盤都好狠，讓盤要去到1.5/2同2球盤都有。不過咪話阿水唔提你哋，紅魔鬼近況其實麻麻，今季表現搶鏡嘅新星射手韋碧克上仗又畀曼城尼祖迪莊踢到膝傷，要提早收咧，真係未必能夠大捷，上盤買唔過o架。


至於曼城作客紐卡素表面睇似難打，但喜鵲上星期失驚無神畀韋根炒4蛋，打擊唔細。反而藍月亮今期狀態一流兼氣勢好，泰維斯、阿古路又腳風順，只讓1球唔算多，買上盤有9折收都算唔錯，坐走望贏買得過啦！