卡城贏大賽經驗快扑「錘」

猪拉多纳

03/05/2012
文： 朱楓

今晚英冠爆發升班附加賽4強首回合，卡迪夫城會先喺主場對韋斯咸。賽前個個都睇好「錘仔幫」，但其實卡城附加賽經驗豐富，加上早前踢過英聯盃決賽，可謂慣晒喺緊張環境下作戰，平手盤我捧1.92倍「藍鳥」！（now638台及廣東體育周五凌晨2:45直播）


憑最後10場聯賽保持不敗，卡迪夫城最後取得第6名，攞到附加賽最後一張入場券。今晚主場對韋斯咸，賽前領隊馬基麥基對班波信心十足，話隊中好多球員近兩年都有跟球隊打升班附加賽，加上之前又喺英聯盃決賽僅敗畀利物浦，今次再踢升班附加賽，應該唔會好似之前咁怯場，最後馬基麥基仲玩心理戰，話韋斯咸先係出線大熱，擺明為球員減壓。

韋斯咸中場主力打柴

韋斯咸今季以超強班底打英冠，雖創出球隊史上作客最佳成績，可惜因主場成績太差，最後未能「直升」英超，喺煞科戰主場對侯城，更有中場路蘭、加利奧尼爾同中堅湯堅斯3大主力先後受傷，當中今季表現勁Sharp醒嘅加利奧尼爾仲因足踝有事，肯定緣盡今晚嘅大戰，作客卡迪夫城絕對有隱憂。


英冠附加賽賽制：聯賽第3名對第6名及第4名對第5名，採兩回合主客制，不設作客入球優惠，兩回合計打和將於次回合法定時間後加時30分鐘，再和則互射12碼決勝。