基多高原智抵玩

猪拉多纳

03/05/2012
文： Mic少

玩南美自由盃，Mic少之前成日講，最緊要熟讀地理，長捧高原主場球隊實冇衰！明早十六強首回合基多主場對智利大學，又係出擊良機。厄瓜多爾球隊基多主場位於海拔2,850米，往往令「平地」球隊喘不過氣，佢哋今屆自由盃主場三戰全勝兼不失，充分證明高原氣候嘅無敵威力，今場主勝有2.05倍抵玩。（周五早上8時15分開賽，馬會網上文字直播）


提起厄瓜多爾球隊，好多人會即時諗起08年自由盃冠軍利加大學，雖然基多名氣唔及「利大」，但高原主場威力一樣咁犀利，今屆三場分組賽主場全勝，攻入十球兼冇失波，絕對唔嘢小。不過三場作客只得一分，可想而知基多完全靠晒主場搵食，所以佢哋今仗一定會利用高原氣候優勢，務求贏到盡，減低次回合作客被對手收復失地嘅機會。

智利大學係作客蟲

至於智利大學雖然兩年前曾打入四強，但其實佢哋近年並非自由盃常客，更加講唔上係爭標分子。「智大」亦係一支主強客弱特質好明顯嘅球隊，今屆分組賽三場主場贏晒，但三場作客只得一勝，今仗去到高原地區更加凶多吉少。