祖記氣勢勁萊切冇得剩

猪拉多纳

02/05/2012
文： 郭球奇

今晚意甲加開快車，其中「一哥」祖雲達斯主場對萊切，雖然兩軍都要搶分，不過論實力，祖記何止高出一皮？最重要係佢哋條「MVP」中場線踢到曉飛，難得對住弱旅萊切，今鋪一定唔會手軟，1.48倍「讓球主勝」值得熱捧！（now633、660台及中央5台周四凌晨2：45直播）


祖雲達斯今季表現超穩定，目前更係歐洲5大聯賽中唯一不敗之師，咁都未算猛料，佢哋最近仲喺意甲豪取8連勝，氣勢勁到得人驚。其實祖記早前曾陷入一段小低潮期，不過教練干地當機立斷，立即改踢352陣式，一次過用馬治斯奧（Marchisio）、維達爾（Vidal）、派路（Pirlo）三位中場中路球員同時上陣，結果效果出奇地好，成功打造出MVP組合。

馬特尼 加利亞雷拉復出

講到干地嘅戰術真係一絕，早排祖記鬧前鋒荒，諗都諗唔到呢位教頭竟然夠薑用硬晒軚嘅波里路擔正，呢位土炮箭頭亦不負所託，交出2個士哥。隨住馬特尼刑滿，啱啱同球會續約至2015年嘅加利亞雷拉又傷愈復出，祖記前線有3位大將畀干地調配，配合近8場聯賽只失過1球嘅黃金防線，「老婦人」今鋪睇落對萊切真係難尋敗理！


不過咁，今季已攻入7球嘅維達爾賽前就叫隊友唔好自滿，希望大家由開波到完場都咁認真，戰意爆燈。事實上，祖記今場贏波而AC喺另邊廂輸波的話，「斑馬軍團」就可以憑較佳對賽成績提早封王，又難怪維達爾咁緊張嘅。

萊切殘陣 近3戰不勝

萊切早前改由前佩魯賈教練哥斯美執教，表現仍然冇起色，上仗主場不敵帕爾馬後，已累積3場不勝，跌到落第18位。雖然佢哋今仗有翼鋒古達度刑滿，但又輪到後衞安德列艾斯普薛圖停賽，而且門將祖利奧沙治奧仲養緊傷，今晚作客祖記想搶分護級？睇怕難過登天！

橫數千軍

主場王祖記8連勝

‧近8仗聯賽全勝，有7場射入2球或以上。

‧意甲主場王，獲12勝5和，勝率達71%。

萊切近8戰僅2勝

‧近8戰2勝4和2負，6次開出半場和。

‧近6次作客祖記得1勝1和4負，4場輸波均失2球或以上。

萊切作客祖記例大敗

2010/10/17 客負 祖記 0：4

2009/05/03 客和 祖記 2：2

2006/11/25 客負 祖記 1：4

2006/02/26 客負 祖記 1：3

2005/04/17 客負 祖記 2：5