車路士紐卡素做大騷

猪拉多纳

02/05/2012
文： 朱楓

家陣英超除咗爭標同護級，其實第4位之爭亦一樣好激！今晚車路士同紐卡素兩支競爭對手，就會喺史丹福橋交鋒。近況大勇嘅「藍戰士」睇落秤先，但為咗留力英總決賽，今晚或派大量副選，對住隨時知恥近乎勇嘅「喜鵲」，朱楓覺得呢場1.62倍入球大抵玩！（有線200及300、廣東體育周四凌晨2：45直播）

「車仔」留力盃賽派副選

目前熱刺僅以得失球較佳壓倒紐卡素排第4，亦僅領先第6位嘅車路士1分。今晚「藍戰士」主場對紐卡素，勝負對邊隊取得今季英超第4、出線下屆歐聯外圍賽真係好關鍵，當然大前提係車路士攞唔到今屆歐聯冠軍啦！


「藍戰士」自從由看守領隊迪馬堤奧執教後，成班波脫胎換骨，唔止神奇殺入歐聯決賽，啱啱仲喺主場大炒昆士柏流浪6：1，當中「王子」費蘭度托利斯仲取得加盟後首個帽子戲法，不過朱楓估計迪馬堤奧今場或會收起「王子」等一眾主力，事關「藍戰士」踢完紐卡素3日後就要同利物浦踢足總盃決賽，而且鬧緊中堅荒，今場只得泰利同刑滿嘅伊雲洛域可以用，對住只搏英超一條戰線嘅紐卡素，難免比較蝕底。

「喜鵲」知衰大踢爭氣波

另邊廂嘅紐卡素上場對護級球隊韋根，竟然爆大冷輸0：4，而且4個失波全部喺上半場失，真係醜到爆，頻頻犯錯嘅右閘丹尼森遜賽後亦要向Fans道歉。賽後領隊柏杜解釋，下半場中段換走賓艾化，全因見球隊大勢已去，希望「賓仔」留力今戰，至於中場迪奧迪就呼籲隊友盡快忘記韋根場波，專心今晚對車路士，隊長高洛仙尼更稱球隊仍有機會殺入前4嚟振奮軍心，睇落今晚應知恥近乎勇，踢番場好波。


事實上，紐卡素近日已積極組軍為下季做準備，傳聞將簽入外借史雲斯嘅中場基菲爾施古臣、燕豪芬左閘派達斯同漢堡前鋒孫弘民，今晚作客車路士真係唔似會死守博1分，話唔定未到半場已經「大」打出手！

橫數千軍

藍戰士旺開半場勝

‧近8場5勝3和，5度開出「半場勝」。

‧近6次交手，錄得2勝3和1負，贏嘅2次都派蛋（2：0、3：0）。

喜鵲作客不敗率近6成

‧近8場錄得6勝2負，只得1場食白果。

‧聯賽作客7勝4和7負，不敗率達59%。