喜鵲鍊車歐聯波飛大戰

猪拉多纳

02/05/2012
文： Mic少

今晚上演「歐聯入場券」爭奪戰，車路士主場對「喜鵲」紐卡素。兩軍打和只會益咗熱刺，預料雙方都會搏盡求三分。車仔前鋒費蘭度托利斯已全面復甦，「喜鵲」亦有柏比斯施斯瘋狂數胡，兩軍射手大晒冷勢演入球騷，捧大。


（有線300及200台周四凌晨2時45分直播）


費蘭度托利斯早前歐聯於魯營重生，上輪聯賽更大演帽子戲法，助車仔大炒昆士柏流浪，現已重拾自信，勒都勒唔住。雖然話車仔將於周六晚會同利物浦爭足總盃冠軍，但現今球壇歐聯大過天，相信佢哋仍然會以打入聯賽前四為先。


紐卡素上仗作客○比四大敗畀韋根，被熱刺搶走第四位，餘下三場聯賽不容再失。「喜鵲」勝在進攻人腳鼎盛，一對塞內加爾前鋒柏比斯施斯及丹巴巴亞入球產量高，加上中場賓艾化後上攻門亦具威脅，車仔防線人腳不整，難保不失。

梅姆巴入場撐保頓

另一場保頓護級大過天，坐鎮「無敵主場」唔赦熱刺！熱刺去到銳步球場例冇運行，齋計聯賽，已十二年未試過作客擊敗保頓，加上二○一二年作客聯賽未贏過，讓波盞搞。而梅姆巴今戰入場力撐，保頓有運行，捧「讓球主勝」！


（有線301及201台周四凌晨3時直播）