北九州愈窮愈醒唔怕千葉

猪拉多纳

30/04/2012
文： 九叔

欠落周身債嘅球隊，唔一定無心戀戰！好似日乙隊北九州向日葵咁，上季純虧損達到6,500萬日圓，不過蝕嗰啲相當部分係開心錢嚟嘅，班人士氣冇問題，今日响日本長假期快車主場迎戰千葉市原受讓平半，下盤有得諗。（開賽時間：周一下午2：00）


家陣排第8嘅北九州，早幾日宣布嘅上年度收支決算，純虧損達到650幾萬港紙，係球會創建以嚟，赤字首度超過3,500萬日圓。點解蝕得咁慘？球會解釋主要係天氣惡劣加埋東日本大地震，嚴重影響咗票房，其次係宣傳推廣活動開支大增，最後一個原因係隊波舊年踢得好咗，贏波獎金支出增加，咁即係使多咗開心錢啦。


其實北九州的確一季踢得比一季好，亦都操起咗啲新人，好似今季入咗4球嗰個前鋒渡大生，今年只係得18歲啫，成隊波個走勢係向上嘅，所以暫時唔使擔心錢銀問題會打擊士氣。當然，從往績去睇，北九州歷史上主客場4戰千葉輸晒，主場嗰兩次都係齋吞3蛋，今場波表面睇冇乜着數。但係今時唔同往日嘞，北九州主場不敗率達60個巴仙，作客勝率得兩成嘅千葉，點讓人哋平半呀？博北九州下盤啦。