風林黃蜂大火併

猪拉多纳

30/04/2012
文： ComboKing

日乙開快車，阿King重心推介甲府風林主場對福岡黃蜂，要入球大。兩隊上季仲喺日職比賽，今季一齊降落日乙，當中以風林表現較出色，決心盡快重返日職。不過黃蜂勝在攻力強，兩位主將阪田大輔及成岡翔腳風非常順，有力同主隊火併。（周一下午3時開賽）


甲府風林上季僅以三分之差護級失敗，球隊上下都覺得好唔抵，今季爭升班決心十足，每場比賽都會搏命，現已佔據三甲位置，表現對辦。風林最大殺着必數巴西前鋒達維，佢今季已射入九球，喺射手榜獨佔鰲頭。加上中場永里源氣及柏好文都有數胡能力，風林主場出擊更加可盡情搶攻求三分。


講進攻人腳，黃蜂亦唔失禮，阪田大輔已有六球進帳，僅次於對手達維，而中場成岡翔都射入四球。球隊今季踢十場聯賽，已累積十八個入球，仲多過排第二嘅山形山神。以黃蜂嘅火力，足以對風林防線構成重大威脅，預料今場不乏入球。

比馬山神作客都掂

另外，榜首湘南比馬上仗被打破不敗之身，但佢哋實力雄厚，今仗作客FC愛媛，可望迅速反彈，平手盤要湘南比馬。至於東京綠茵主場對山形山神，雙方實力接近，山神受讓有着數，要「讓球客勝」。