熱刺「讓和」回「布」高

猪拉多纳

29/04/2012
文： Yennie

今季英超激到暈，除咗曼市雙雄爭冠軍，就連歐洲賽席位亦鬥到你死我活，勁精彩！原本可以再戰歐聯嘅熱刺，近期竟然嚴重跌Watt，連續3場聯賽失分跌到落第5位，依家連爭歐霸盃入場券都未必掂。好彩，佢哋今晚嘅對手布力般排到去尾2，近6場亦只得1勝，小妹信「爛船都有三斤釘」，一於博熱刺小勝，要3.7倍「讓球和」。（有線200、300及廣東體育周日晚11：00直播）

左閘伊高圖提早收咧

季初熱刺嘅表現，真係令唔少球迷刮目相看，有球評家更認為呢支「Big4」殺手返晒嚟，有機會改變雙雄割據嘅局面！可惜人算不如天算，自從傳出領隊夏利列納會執教英格蘭國家隊後，成班波好似洩晒氣咁係咁失分，就連盃賽都出晒局，近10戰僅贏得3場，跌吓跌吓連前4位置都不保，小妹睇見都覺得心酸！


事實上，論人腳，熱刺絕不比曼市雙雄遜色，雲達華治、加里夫巴利、莫迪歷全部都星味十足，亦係我鍾意嘅球星，計質素布力般又點能夠相提並論吖！不過，熱刺有左閘伊高圖提早收咧，射手艾迪巴約亦只係好番冇耐，要炒起對手係有一定難度嘅。

布力般踢穩守唔會大敗

熱刺要為前4努力，另邊廂嘅布力般依然要為護級而煩惱。布力般今季戰績長期低落，領隊堅恩雖備受壓力，但始終保得住帥位，搞到班球員都有少少不滿，主力基斯杜化森巴更提早跳船離隊。不過布力般勝在有自知之明，往往都係踢穩守突擊，上仗佢哋贏完諾域治終止5連敗，希望佢哋食住個勢，踢得好好睇睇，輸1粒當交學費！


半隻腳踩咗入o靚模界，但最後決定以學業為重。如今畢業了即捲土重來，希望大家支持。外國波、本地波都係佢「飛佛」。

Yennie推介

熱刺（讓球和）

微博傳情 \(^O^)/

啱啱過咗嘅星期三，我同朋友出海玩wakeboard。嘩！足足半年無玩過喇，生疏咗好多！撞正今個星期日日都天陰陰咁，好彩天公作美，我哋出海嗰陣冇落雨，但因為無太陽嘅關係，落到水都幾凍吓！下星期就到5月喇，又到船河季節，各位好朋友有船P記得預埋我呀！