川迪阿積士搶分大晒冷

猪拉多纳

29/04/2012
文： 笛子波童

周日晚荷甲好戲連場，榜首四強互相對撼，阿積士目前爭標形勢大好，作客川迪就算唔贏都冇蝕底。川迪為爭歐聯席位之餘，亦要搶分力保歐霸盃參賽資格，去到季尾關鍵時刻，兩軍再冇保留必要，入球大係波童首選。


（now 639周日晚8時30分直播）


目前榜首形勢，阿積士領先阿爾克馬爾、飛燕諾六分，聯賽剩餘三輪，阿積士只要多取四分便可成功衞冕，佢哋最後兩輪對手只係維迪斯及芬洛，所以莫講話今場和波，就算全失三分形勢都唔算太壞。


連同季初超級盃，阿積士本季兩次主場鬥川迪都贏唔到，作客根本冇甜頭，基於戰意有疑點、往績又輸蝕，平手盤捧唔落手。


排第四嘅川迪落後阿積士七分，爭標僅餘數字上機會，應該現實啲將目標定在聯賽亞軍、從而取得下屆歐聯參賽資格。由於第二、第三位嘅阿爾克馬爾、飛燕諾同日對撼，僅落後兩者一分嘅川迪有機會漁人得利，主場出擊唔會保守。


以中位數2.5球計，雙方近五次交手有四次開大，今次中位數冇調高，首選大盤。

燕豪芬作客夠贏洛達

同日早場賽事，排第五嘅燕豪芬只比次席阿爾克馬爾少一分，仍有機會爭踢下屆歐聯，今晚作客遇上只係中游嘅洛達，可望全取三分。

（now 639周日晚6時30分直播）