皇馬巴塞大翻身

猪拉多纳

29/04/2012
文： 法達斯維

上周中齊於歐聯出局嘅皇家馬德里及巴塞隆拿，今晚重返西甲分途出擊，正所謂受傷獅子最可怕，兩軍必力求贏波反彈，遇上同樣具攻力的西維爾及華歷簡奴，隨時演入球騷冧番球迷，法達斯維一於捧晒大盤。

皇馬早場威力 炸西維爾

西甲早場上演強勁戲碼，皇家馬德里坐鎮主場迎戰西維爾。由於歐聯出局，皇馬極希望盡快鎖定聯賽冠軍，面對「私房菜」西維爾理應實食冇黐牙，但皇馬防線唔穩陣，相信雙方會筵開一場「入球盛宴」畀球迷大快朵頤，大細中位數調至3.5球照捧1.8倍入球大。（now 632周日晚6時直播）

上次早場開「其他」

上周中歐聯對拜仁，皇馬主帥莫連奴跪晒地睇極刑大戰時，睇得出佢對球員體能憂心忡忡，事隔唔夠三日，他們能否及時恢復頓成疑問。因此，莫帥今仗會作出適當輪換，但無論用比比或華拉尼夥拍沙治奧拉莫斯，尤其防守高空波方面都不能予人信心。


不過莫帥係心理大師，有聯賽冠軍的推動力，相信佢能迅速調整球員心態。還記得皇馬今季打過一次早場，就係主場七比一大炒奧沙辛拿，值得參考。


西維爾仍有機會爭歐霸席位，今仗唔會坐以待斃，前線如尼格度、迪摩奴、捷西斯拿華斯均狀態回升，況且他們要為入選西班牙國家隊爭取表現，實同皇馬搏甩髀，入球大不容錯過。