紐卡素客W「根」得過

猪拉多纳

28/04/2012
文： 朱楓

依家英超第4隨時冇歐聯踢，紐卡素今晚作客韋根，就更加要搏命！「喜鵲」近期勁到冇人有，又有「效率王」柏比斯施斯繼續披甲，今晚佢哋作客實力見晒底嘅韋根，絕對有權開2.35倍客W！（有線204及304周六晚10：00直播）

韋根同喜鵲鬥攻聽衰

紐卡素近期連贏6場升上第4，落後第3位嘅阿仙奴3分但打少場，絕對有條件攞季軍直入來屆歐聯分組賽。射手「柏比CCC」實在太有效率，1月加盟後上陣11場喪入11球，配合狀態同樣大勇嘅賓艾化同卡比耶，鋒力勁爆。而且「喜鵲」啱啱公布喺嚟緊主場對曼城一戰，會整個卜比笠臣雕像喺球場外面，搞咁多嘢，斷唔會呢場先嚟失分啩？


對家韋根近期為護級再一次爆發小宇宙，先後擊敗利物浦、曼聯同阿仙奴升上第17位，但成績突然咁勁，紐卡素又點敢輕敵吖？賽前韋根領隊馬天尼斯話迪山度同洛達列加已傷愈，今晚會派佢哋落場搶分，但紐記近期連續4場冇失波，班進攻球員嘅卡士同默契又高過韋根，韋根想同「喜鵲」鬥攻，只會大出洋相。