維拉撼保頓攻「細」難求

猪拉多纳

24/04/2012
文： 朱楓

今晚英超會上演一場補賽，阿士東維拉喺主場迎戰保頓，合演護級大戰。兩隊近期火力嚴重不足，加上齊齊有多名主力倦勤，預期入波唔會多，朱楓推介1.82倍入球細！（有線200及300周三凌晨2：45直播）

維拉和波都心足

今場波本來喺上個月中舉行，但由於保頓中場梅姆巴早前喺球場上心臟病發暈倒，呢場護級大戰惟有延至今晚作賽。維拉喺下半季狀態急跌，主要因為射手戴倫賓特重傷，以及隊長柏杜夫因血癌無限期休戰，好衰唔衰日前對新特蘭一役，仲有中堅占士哥連斯同新隊長艾邦拉荷齊齊傷出，今晚多數唔使預佢哋，朱楓預計維拉唔敢亂攻，多數以1分為目標，畢竟目前佢哋排喺英超第15位，距離護級安全線有5分差距，比起第18位嘅布力般流浪又打少1場，形勢上今晚對保頓只要唔輸，仍然有好大機會護級成功。


保頓目前排英超第19位，落後第17位嘅韋根3分，但比對手打少兩場，今場極有需要全取3分，遺憾係今季缺少咗翼鋒李青龍之後，進攻始終冇乜特別板斧，今晚仲有中場麥克戴維斯同戴倫柏利上陣成疑，傷兵問題咁嚴重，真係唔似咬得入維拉。