馬拉加搶客W保前4

猪拉多纳

23/04/2012
文： 走肖

情感上，真係好想支持「窮債主」奧沙辛拿，但現實係殘酷嘅，「暴發戶」馬拉加要搶分爭取來屆歐聯入場券，未來幾場波真係1分都不能少，今晚佢哋喺西甲獨腳戲作客有7名主將唔出得嘅奧沙辛拿，吼實2.1倍客W着數。（廣東體育周二凌晨3：00直播）


馬拉加得到中東資金撐腰後，今季喪燒1.5億歐元擴軍，可惜近4場僅得1勝1和2負，假如再唔發力，隨時衰收尾跌出前4踢唔到來屆歐聯，就算最近有門將韋利卡巴尼路受傷，中堅馬菲臣今場要停賽，依然捧得過。

奧沙辛拿7件唔出得

記得今季冬季轉會市場重開，奧沙辛拿曾經向馬拉加追債，因為佢哋出售左閘蒙利爾畀對方後未收齊尾數。由於馬拉加有錢唔找數，同時仲欠維拉利爾錢，幾乎被勒令唔准買人。雖然最終事件解決，但同時間揭發奧沙辛拿原來經常欠薪，試過衰到連200萬歐元都湊唔齊出糧。


正所謂人窮志短，表面上奧沙辛拿要爭踢歐霸盃開拓財路，可惜今場有近期頻頻入波嘅中場魯爾加西亞停賽，前鋒伊巴謙巴爾迪就要代表塞內加爾，出戰對阿曼嘅奧運外圍賽，連埋傷兵隨時有7件缺陣，想搶分恐怕有心無力。