祖記「-1」贏到盡

猪拉多纳

22/04/2012
文： 麥馬拿仁

今晚意甲的爭標主角祖雲達斯，將於主場對羅馬。今場係「斑馬兵團」爭標路途上最後一個難關，只要今場能夠順利擊敗羅馬，相信餘下對手都好難阻到祖雲達斯捧盃。祖雲達斯好鬥志唔在講，仲有好狀態支持，羅馬難免會被睇低，巨高今場揀「讓球主勝」。


（now 633及660周一凌晨2時45分直播）


自06年電話門醜聞之後，祖雲達斯都未好過，故此今季會方決定大灑金錢擴軍、換帥兼由快意家族成員重新掌舵，咁多大動作無非都係想贏番次聯賽冠軍，以重新確立意甲強旅地位。球隊有咁宏大嘅目標，唔怪得每場比賽都顯出無比鬥志。


事實上，祖雲達斯仍然保持聯賽不敗，講賽績真係冇一隊夠佢揮，要殺退羅馬唔難。


最可怕係祖雲達斯班後備一樣有料到，淨係一個迪比亞路已經玩死你。雖然呢位老牌「金童」同球隊嘅合約即將到期，但佢冇懶懶閒等退休，教練干地每次派佢落場都交足功課。就好似上輪聯賽對拉素，如果唔係靠佢射入妙絕罰球，三分未必攞得晒。祖雲達斯連後備力量都惡過人，羅馬憑乜同佢哋鬥。

1月對碰羅馬吞3蛋

唔否認羅馬好有質素，但始終都唔係爭三甲嘅材料，作客經常輸波足證球員仍欠穩定性。而本年1月意大利盃，羅馬到訪祖雲達斯嘅新球場完全唔夠打，最終就輸○比三，睇怕今次都好難由蟲變龍。