史浩克感冒虛不受堡

猪拉多纳

22/04/2012
文： 蘇斯黑柴

德甲奧格斯堡主場鬥史浩克04，雙方各有所爭，不過史浩克去到季尾作客愈踢愈沉，加上受流感侵襲影響備戰，仲要讓波制唔過，黑柴吼奧格斯堡受讓平半嘅下盤。（有線61及204台周日晚9時30分直播）

史浩克殘陣作客讓唔起

史浩克近期兩連敗，季軍席位受到慕遜加柏強力威脅，不過球隊季尾作客表現奇差，近9場作客嘅正式賽事1勝3和5負，唯一勝仗只係對包尾嘅凱沙羅頓，而且球隊喺過去一周受流感侵襲，門將烏拿史杜爾、左閘沙治奧艾斯古迪路、大勇嘅翼鋒法芬同副選箭頭馬利卡都抱恙，到上周四都缺席操練。天才中場達斯拿、中堅柏柏杜普路斯今仗因傷缺陣，主力左閘基斯甸富治斯累積5面黃牌要停賽，由於另外兩名門將費文同希迪布蘭都養緊傷，今晚喺門將同左閘兩個位置排陣都會遇到困難。


奧格斯堡季尾愈踢愈進步，近9場聯賽4勝3和2負，未計尋晚賽事，已領先尾三嘅科隆4分，護級形勢審慎樂觀，佢哋喺主場出擊威力更強，近4場主場賽事3勝，只輸過畀目前德甲最弗嘅史特加，上仗既可以作客擊敗富豪球會禾夫斯堡，狀態同士氣都處高峰，今晚主場受讓要追。