史特加哈化雙Ｗ過關

猪拉多纳

21/04/2012
文： 蘇斯黑柴

德甲倒數第3輪，今晚焦點同直播賽事落喺榜首雙雄多蒙特同拜仁身上，不過兩軍目前差距遠達8分，冠軍誰屬基本上已無懸念，從投X角度出發，兩軍都冇捧場價值。今晚睇好弗爆嘅史特加同非勝不可嘅哈化柏林齊齊贏波，玩齋Ｗ二串一。

拜仁玩輪換留力歐聯

今晚頭場焦點係雲達不來梅主場鬥拜仁慕尼黑嘅南北大戰（有線61及64台周六晚9時30分直播），拜仁數字上爭冠未絕望，但實際上早已扯白旗，佢哋啱啱喺周中歐聯四強首回合主場贏咗皇家馬德里2：1，已經將全副心思擺晒喺下周四凌晨作客巴拿貝嘅次回合之上，老帥軒歷基斯近期聯賽大玩輪換，相信今仗必然留力，不過不來梅狀態奇差，踏入今年14場聯賽僅得2勝，加上目前傷兵同停賽問題都極為嚴重，即使遇上拜仁二隊都冇把握，今場忍手為上。

多蒙特隨時未踢封王

至於尾場多蒙特主場對慕遜加柏（有線61及201台周日凌晨零時30分直播），多蒙特今仗贏波即可提前喺主場慶祝奪冠，不過大家要留意呢場波喺拜仁嘅比賽完結後至上演，若然拜仁未能擊敗不來梅，多蒙特未踢已經自動提早封王，係唔係真正要搏都成問題，而且仲要顧慮到多蒙特球迷同史浩克係世仇，若然多蒙特未踢就提早封王，主場球迷喺慶祝之餘，隨時會倒戈為對手慕遜加柏打氣，因為慕遜加柏正同史浩克爭緊季軍（下屆直接進身歐聯分組賽資格），而且佢哋今季鬥榜首三強3勝1和1負，今場多蒙特亦不宜熱捧。


今晚揀咗科隆主場對史特加同哈化柏林主場對凱沙羅頓兩仗（周六晚9時30分開賽），史特加係季尾全德甲狀態最弗同攻力最強球隊，對住換帥都全無起色嘅科隆，捧客Ｗ同大盤；至於哈化上仗作客踢少個都可以喺利華古遜主場全身而退，護級決心十足，今晚主場可勝鬥心盡失嘅榜尾球隊凱沙羅頓，捧主Ｗ同「讓球主勝」。