藍軍攰爆呢場係咁仙

猪拉多纳

21/04/2012
文： Wendy

大家踢波輸咗會唔會冇晒心機？人有情緒係理所當然嘅。就好似上星期阿仙奴輸畀韋根，由於阿仙奴嗰場都唔係放軟手腳去踢，咁都輸條氣就真係唔順。所以賽後班韋根球員想同尹佩斯握手，呢位「兵工廠」隊長都唔多願意。唉！仲邊有心機吖？今晚阿仙奴大戰車路士，呢場有線再度喺高清204有3D直播。我認為阿仙奴為確保英超季軍席位一定肯搏，所以信多阿仙奴一次。

王子唔夠魔獸可靠

有往績可尋o架！好似上月尾「兵工廠」輸咗畀護級嘅昆士柏流浪，之後對曼城就能夠反彈取勝，今晚佢哋亦應有「知恥近乎勇」之心。再者，阿仙奴亦可以趁「車仔」周中搏咗一場歐聯，用較優勝嘅體力力壓對手。回想首循環時，阿仙奴去到史丹福橋亦能大勝5比3，當時尹佩斯仲食出「大三元」，心理上有優勢o架！當然，「車仔」都會為爭返入前4搏鬥，但小妹就睇淡佢哋，全因周中贏巴塞搏得太盡。嗰場「車仔」防線非常忙碌，全場被巴塞攻到有氣冇碇抖，隊長泰利仲要忍住肋骨裂嘅痛楚比賽，所以今晚應該會見到疲態畢露嘅「藍軍」。


周中做英雄嘅「魔獸」杜奧巴，今晚應該會被收起，改由「王子」費蘭度托利斯擔正。雖然話「王子」狀態回升，但仍然覺得佢冇杜奧巴咁可靠，有佢出場勝算就更低。大世界開出亞洲盤阿仙奴讓平半低水，馬會都係，所以一於半格博全格，要上盤！

Wendy推介：

阿仙奴 對 車路士 上盤