車仔再揼阿仙奴

猪拉多纳

21/04/2012
文： 蘇豪

車路士繼續魔鬼賽程，今晚將作客阿仙奴合演英超倫敦打吡，車仔正處於全季最勇最銳之時，上周喺足總盃大炒熱刺入決賽、周中歐聯更連地上最強巴塞隆拿都砌低埋，氣勢可謂一時無兩！為爭取下屆歐聯席位，車路士已無退路，作客「兵工廠」仍然瞓身搏殺，受讓之下要「讓球客勝」！（有線300及200台周六晚7時45分直播）

為歐聯席位奮戰

車路士恐怖賽程可謂關關難過關關過，足總盃狂數熱刺後，再於歐聯4強戰勝地上最強巴塞隆拿，大軍踢法簡單直接，甚具莫連奴時代影子，已經重回全盛時期嘅水平。車仔硬仗連場，而且老將多，唔少人擔心佢哋會體力不繼。不過，佢哋今季真正硬仗唔多，現時球員處於全季最佳狀態，落到場人人充滿激情，足以蓋過體力問題，實在毋須擔心太多。


車路士嚟緊周三凌晨要作客魯營球場再戰巴塞，今場夾正喺歐聯兩回合大戰中間，確實好惡打，但絕對不存在戰意不足問題，對車路士嚟講，歐聯及聯賽一樣咁重要，若今場輸波失落下屆歐聯席位，如果跟手歐聯攞唔到冠軍，咁到時點向老細阿布交代先？車仔今仗或搵王子費蘭度托利斯取代杜奧巴攻堅，另有守將伊雲洛域停賽，不過整體而言仍然擁有強橫戰鬥力。

兵工廠讓唔起平半

阿仙奴上場成為另一支畀韋根打敗嘅名牌球隊，韋根喺7分鐘同8分鐘連擊射入兩粒，反映「兵工廠」後防唔夠集中，今場高手過招一次失神足以致命，佢哋確實未能予人太大信心。


另外，「兵工廠」中場重心阿迪達上仗早段傷出，改由艾朗藍斯策劃攻勢效果麻麻，今戰阿迪達繼續缺陣，班波嘅氣勢明顯已經轉弱，讓平半實在冇乜道理，可博「讓球客勝」！

兩軍近10次對賽成績

日期 賽事 戰果

29/10/11 英超 車路士 3：5 阿仙奴

28/12/10 英超 阿仙奴 3：1 車路士

03/10/10 英超 車路士 2：0 阿仙奴

08/02/10 英超 車路士 2：0 阿仙奴

30/11/09 英超 阿仙奴 0：3 車路士

10/05/09 英超 阿仙奴 1：4 車路士

19/04/09 英足盃# 阿仙奴 1：2 車路士

01/12/08 英超 車路士 1：2 阿仙奴

24/03/08 英超 車路士 2：1 阿仙奴

17/12/07 英超 阿仙奴 1：0 車路士

註：前者主場，#為中立場