巴塞皇馬激情大騷

猪拉多纳

21/04/2012
文： 法達斯維

西班牙國家打吡巴塞隆拿主場對皇家馬德里今晚矚目上演，同場加映「三英戰美斯」，今季個人總入球達63球嘅巴塞極速球王美斯，力抗坐擁百球火炮C朗拿度、賓施馬同希古恩嘅皇馬來襲，其中美斯同C朗於西甲射手榜並駕齊驅，係時候嚟個了斷。關乎冠軍、金靴、面子之戰，雙方一定搏甩髀求勝，一於捧入球大。（now 632周日凌晨2時直播）

西班牙國家打吡

儘管皇馬教練莫連奴會以保守姿態作客魯營，求和以保住四分領先優勢，但想守唔代表守得住。睇番皇馬近十三場比賽，只有兩場冇失波，以艾比路亞、沙治奧拉莫斯及比比之流嘅防線，面對改踢343陣式、必須贏波延續衞冕希望嘅巴塞，點頂得住呀？單係美斯一人，已在各項賽事累積63個士哥，加上沙維、恩尼斯達、丹尼爾等後上支援，皇馬久守必失，到時想唔焗攻都幾難。

皇馬鬥攻唔輸蝕

今年一月尾西班牙盃八強次回合，皇馬試過作客落後兩球劣勢下，竟反客為主圍攻巴塞，終憑C朗同賓施馬頑強地扳平，演出大獲好評，證明呢支聯賽射入過百球的球隊要進攻時都唔赦巴塞，或許能帶給莫帥啟示。


尤其係C朗，現與美斯同得41球排聯賽射手榜一哥，若今次能在魯營入波奠勝，便可一洗大戰腳軟惡名，好勝C朗點會唔搏盡爭士哥呢？而兩軍頭號WAG碧基女友夏奇拉及C朗女友伊蓮娜亦好可能在看台鬥「騷哥利」，無論場內場外，都「大」有睇頭啦！