巴塞再啅車仔

猪拉多纳

18/04/2012
文： 阿占

今晚歐聯4強首回合會上演一場重量級對決，由車路士主場迎戰「地上最強」巴塞隆拿。賽前「車仔」講到明要報番09年出局之辱，不過報仇唔係得把口，車路士今時今日嘅實力比起3年前更削，對住大熟大勇嘅「球王」美斯，睇怕會輸得心服口服，小弟捧1.57倍客勝！（有線61、64、201及204、中央5台、廣東體育周四凌晨2：45直播）


車路士09年喺歐聯4強對住巴塞，雖然兩回合打成平手，但就輸作客入球被踢出局，車仔上下至今耿耿於懷，認為球證多次偏幫，巴塞先至出到線，林柏特賽前更講明要報一箭之仇！不過講係咁講，當年「藍戰士」既有狀態正值巔峰嘅艾辛、杜奧巴、林柏特，又有「托弗」嘅迪高、波歷克同祖高爾等，整體實力肯定勁過依家隊「藍軍」，嗰時都唔夠揪，今日憑咩復仇？

藍戰士跌Watt攻守唔掂

雖則話踢波係逐場計，但車路士依家嘅狀態嚴重下滑有目共睹，尤其派跌晒Watt嘅泰利扼守中路，真係睇到球迷心驚膽跳！今場對住地球上火力最猛嘅巴塞，隨時畀美斯玩到一戙都無啦！佢哋前面靠費蘭度托利斯衝鋒陷陣，但佢面對嗰兩個係國家隊隊友佩奧爾同碧基，想搵食無咁易。


查實09年場波對巴塞同樣意義重大，大部分球迷都認同嗰場係「巴塞王朝」嘅起點，自從恩尼斯達球世界波絕殺「車仔」，幫巴塞闖入決賽兼捧盃後，「地上最強」就開始橫掃球壇。依家佢哋季尾開始再發力，美斯嘅入球騷亦無停落嚟嘅迹象，對住今非昔比嘅車仔，大有機會贏波重溫好夢！

橫數千軍

 車仔歐聯主場贏晒


‧今屆歐聯5場主場賽事全勝。

‧費托過去10次喺西甲鬥巴塞總共轟入7球。

 巴塞連開4口大

‧最近4場比賽都開入球大。

‧對上3次同車路士交手，全部和波收場。

賽制：歐聯4強採主客兩回合制，今輪為首回合，若兩回合總比數賽和，以作客入球較多一方為勝，若作客入球相同，則在次回合後加時30分鐘，若雙方在加時取得相同數量入球，由作客球隊獲勝，若加時沒有入球，則互射12碼分勝負。

頂占筍盤：巴塞隆拿（客勝）

有線球彩台主持阿占

電郵：soccer64@cabletv.com.hk

PHONE波熱線：1831 678

「球彩俱樂部」開放時間：周三晚10：00至11：45