車仔盛藍愛作戰

猪拉多纳

18/04/2012
文： 美斯謙

歐聯四強首回合大戰，車路士主場迎戰巴塞隆拿。車路士剛於英足盃四強戰大勝熱刺，該仗費蘭度托利斯只列後備，全因要儲力鬥「地上最強」，費托以往十次對住巴塞入七球，今次將成為迪馬堤奧殺敵王牌。巴塞近況雖亦不俗，但作客出戰再加上有國家打吡後顧，今仗就算和波都不算是壞事，車路士「讓球主勝」值得支持。


（有線61及201台周四凌晨2時45分直播）


要數歐聯最悲慘角色，非車仔莫屬，自阿布拉莫域入主以來，球隊多次與歐聯擦身而過，最接近一次係07/08球季決賽，泰利跣腳射失十二碼痛失冠軍，及後08/09球季四強在球證偏幫巴塞下，完場前被恩尼斯達踢出局。「藍戰士」陣中一班「中佬」泰利、林柏特及艾殊利高爾等，在球場可謂「時日無多」，今屆可能係佢哋最後一次衝擊歐聯決賽，一定搏盡老命向巴塞復仇。


車路士近期表現已重拾正軌，自三月中不敵曼城後，已連續七場賽事未嘗一敗，其中周日晚大炒熱刺，更見球隊已完全回復昔日狀態。車路士面對巴塞往績不算太差，歐聯碰頭十次取得三勝四和三負，不敗率算高，加上巴塞近年作客「藍橋」史丹福橋球場戰績不算太強，車路士於主場絕對有能力抵擋巴塞進襲。

王子剋巴塞 美斯怕藍橋

車路士嘅西班牙射手費蘭度托利斯當年効力馬德里體育會時，對住巴塞都好旺，十次聯賽碰頭入七球，協助馬體會取得四勝四和二負對賽往績。基於「王子」近期已全面復甦，加上剛戰英足盃只於最後五分鐘後備上陣，明顯為今仗留力，養精蓄銳下有力攻陷巴塞。


巴塞隆拿雖比車路士多一日時間休息，但周六晚將惡戰皇家馬德里，今晚必留一手。此外，「歐聯入球王」美斯卻原來六次對車路士皆「食白果」，真係唔到你唔信邪。