小兵保飯碗斬草除「根」

猪拉多纳

16/04/2012
文： 走肖

無論係唔想畀人叮，定抑或想加人工，落到場都肯定唔會Hea踢。阿仙奴今晚喺英超主場對韋根，食住上要捧1.62倍「讓球主勝」。最近兵工廠定出裁員計劃，準備踢走8個「垃圾球員」，騰出2,300萬鎊薪酬空間，加人工氹包括隊長尹佩斯在內嘅主力續約，戰意盛要繼續追！（有線200、300及廣東體育周二凌晨3：00直播）

查馬克 史基拿斯9成叮走

現時阿仙奴陣中嘅艾沙維、查馬克、艾蒙尼亞、史基拿斯、賓特拿、丹尼臣、卡路士韋拿同朴主永，周薪介乎4萬鎊至7.5萬鎊，但今季完全唔受重用，部分更加被外借。據講兵工廠準備喺暑假進行大清洗，踢走晒佢哋騰出2,300萬鎊薪酬空間，慳番啲錢，就要嚟加人工畀有表現嘅球員。


隊長尹佩斯着晒火，只要肯留隊，大幅加薪絕對唔係問題。同時，仲有3大孭飛球星禾確特、桑治同阿歷士張伯倫都等住加人工，當中阿歷士張伯倫目前得2萬鎊周薪，續約嘅話唔憂冇錢使。仲有呀，近排路斯基同班拿約突然翻生，理由當然同自己飯碗有關，唔想被叮走，梗係要踢好波氹吓領隊雲格。

韋根領隊等炒士氣低落

雖然兵工廠傷兵問題未解決，中堅哥斯尼又坐波監，不過最近有消息話，無論韋根護級成功與否，領隊馬天尼斯都會被炒魷，要知道呢啲消息通常都有啲根據，即使馬天尼斯親自否認，始終令人覺得係佢一廂情願以為自己撈得掂，班球員點睇，有冇士氣又係另一回事。咪忘記韋根剛啱偷雞搞掂曼聯，阿仙奴冇理由會輕敵，搏殺格炒得起對手有餘。

橫數千軍

阿仙奴旺開入球單


‧近10次主場有9勝1負。

‧連續9場開入球單。

韋根作客對賽輸晒

‧對上9次作客阿仙奴全敗。

‧近5場1次半場領先、4次打和。