賀芬咸新帥猛料執到堡

猪拉多纳

15/04/2012
文： 蘇斯黑柴

德甲尾場弗賴堡主場鬥賀芬咸，兩支近期弗爆球隊正面對撼，雙方踏入2012年都取得大幅進步，成功都緣於換帥得宜，黑柴認為賀芬咸少帥巴布更有卡士，球隊平均質素更佳，加上爭勝目標更鮮明，弗賴堡讓平半，黑柴揀賀芬咸下盤。


（有線61及201台周日晚11時30分直播）

巴布新一代教練表表者

賀芬咸班主霍普放棄大搞，今季走青春路線，季初用鐵腕主帥史坦歷斯拉華斯基執教，結果佢同班球員貌合神離，最終由巴布接手，年僅39嘅巴布絕對係新一代教練嘅表表者，08-09年度球季開始執教生涯，已經協助佢上任時排11位嘅史特加奪得聯賽季軍，翌年喺德乙帶領哈化柏林回升德甲，今季上半季亦位列中游，但佢同高層意見不合離隊，之後哈化愈踢愈差，目前已淪落到喺降班邊緣掙扎，只係短短兩、三年間，巴布交出嚟嘅成績有目共睹，難怪德國傳媒已視佢為未來拜仁甚至德國國家隊主帥嘅熱門接班人。


巴布今年二月接掌賀芬咸，至今領軍10場4勝4和2負，而且升勢凌厲，近4戰3勝1和，上仗作客以4球大炒志切救亡嘅老牌勁旅漢堡表現尤其精彩，佢嘅成績表已得到霍普認可，較早前將球會總經理坦納解僱，畀巴布手握大權兼任埋經理職務，目前全隊士氣如虹，贏埋今場，就可以超越另一老牌球會雲達不來梅，仲有機會爭奪下屆歐霸盃參賽資格。

弗賴堡難得上岸要回氣

弗賴堡較早前換帥亦取得成功，雖然放走大部分具經驗戰將，放膽起用新人，但新帥施特賴希擅長激發球員士氣，佢哋近7戰5勝2和戰績超靚，不過始終質素有限，近兩仗對紐倫堡同哈化柏林攞分都有幸運成分，比賽水準唔高，何況一輪急衝後難得已踏上護級安全線，係時候進入回氣期，就算主場都讓唔起同樣弗爆嘅賀芬咸。