水手 光輝合演入球騷

猪拉多纳

14/04/2012
文： Kit

自從殺入澳職季後賽後，隊隊都表現出必贏決心，不求Hea踢。之前5場4度開「大」，今日「復活戰」中岸水手對珀斯光輝，當然繼續追1.92倍入球大啦！（有線64及204周六下午3：00直播）


以私心嚟講，小妹今日當然想光輝贏波，一舉殺入總決賽，皆因水手對獅吼呢個對戰已經睇到悶，由上季至今出現過無數次。若果係你贏咗我，我贏番你報番仇都好睇啲，最弊係水手次次畀獅吼食住，場波未踢已覺得獅吼佔上風，咁場總決賽仲邊好睇？

雙方後上助攻力強

若果光輝殺入總決賽就唔同喇！佢哋季初大量增兵，大家都期望佢哋會成為澳職新勢力。雖然季初班波一路都夾得唔好，但最近整體狀態發揮終於上到顛峰，尤其係史美斯呢期腳風極順！


呢兩支球隊仲有一個共通點，就係班中後場助攻能力唔曳，好似光輝上場對住威靈頓鳳凰就有後衞雲丹布靈射入世界波；而水手亦有施雲斯域30碼遠射省暈獅吼。嚟到呢個最後階段，兩隊都唔想今場係收咧戰。小妹估計，比賽一開大家都必會採取主動進攻，爭取入球，相信今日呢場波可以延續季後賽入球大走勢。

澳職季後賽賽制：

若90分鐘打成平手，需加時30分鐘。若加時仍未分高下，即憑12碼決勝負。

KIT推介：中岸水手 入球大

有線球彩台主持KIT

電郵：soccer64@cabletv.com.hk PHONE波熱線：1831 678

「超級星期六」開放時間：周六晚9：00至周日凌晨2：30