曼城3.5倍讓球和抵玩

猪拉多纳

14/04/2012
文： 安高

同曼聯嘅距離又再拉近番到5分嘅曼城，為咗保住爭標最後生機，今晚佢哋喺英超作客諾域治，對3分自然志在必得。不過，考慮到佢哋今季作客戰績的確麻麻，就算贏到都幾難大捷，3.5倍「讓球和」可以一博！（有線200及300周六晚7：45直播）


「藍月亮」周中返到主場大炒西布朗4蛋，阿古路梅開二度重拾信心，泰維斯今季首次擔正即有「士哥」，總算終止之前3場不勝頹勢，仲趁住同晚曼聯失分，喺聯賽榜追番近啲添！

泰維斯回歸即有貨交

「野獸」泰維斯及時回歸，對曼城嚟講絕對係天大喜訊，事關佢哋近排有巴洛迪利停賽3場，今晚唔使預，迪斯高又狀態低沉，依家有佢喺前線拍住阿古路，夾埋中場大衞施華組成嘅鐵三角，鋒力再次令安高回復信心。


當然，曼城嘅作客成績多少都有啲令人擔心，近10場作客聯賽就只得2勝，失去地利，想佢哋有十足發揮的確有難度。唯一值得慶幸，應該係上輪出訪白鹿徑贏埋熱刺嘅「金絲雀」，家陣夠晒分早已經脫離護級行列，想話爭歐洲賽又唔到佢哋，換句話講鬥志都差多少。就算話「金絲雀」近排主場戰績唔錯，但預計面對曼城狂攻，最後飲恨輸1球都好啱數吖！