曼城慢熱追半和

猪拉多纳

14/04/2012
文： 蘇豪

英超富豪球會曼城今輪造訪中游球隊諾域治，曼城主帥文仙尼畏首畏尾，搞到班波成日喺客場進退失據，1.43倍熱Ｗ唔抵玩！曼城有條靚路，近11場聯賽作客10次開出半場和，慢熱到爆，今場一於再追多口，博半場和！（有線300及200台周六晚7時45分直播）


曼城剛於主場大炒西布朗，追至落後榜首曼聯五分，整個氣氛即時轉晒，搞到好似好有機會收復失地捧盃咁。老實講，以曼城近仗作客演出，就算對住狼隊都未必贏硬，今場表面睇落唔算難踢，其實好惡搞，諾域治踢法簡單直接，大舊中鋒格蘭荷特勁撞得，淨係應付呢條友已經有排煩，之前曼聯作客諾域治差啲失分，車路士直頭跌咗兩分，前車可鑑，咪睇小呢支升班馬。


對曼城嚟講，最有利因素係「腦殘」巴洛迪利停賽，呢條友仔得罪人多、稱呼人少，樹敵甚多，家陣專心做觀眾，唔使篤眼篤鼻，其他隊友心情當然好好多啦。「腦殘」契爺文仙尼作風好保守，作客唔敢叫班波谷得太上，佢哋實力明明係高過對手，但就要勒住踢，上次作客阿仙奴仲搞笑，文帥派出一班進攻球員主守，真係笑死街坊，今次又唔知有乜搞作，客Ｗ真係揀唔落手。

謀定後動兼顧細盤

曼城雖然要爭勝爭冠，但以文帥作風，今場都係謀定而後動，總之唔輸波就唔谷，一味猜猜猜搵機會，就係呢種唔見棺材唔流眼淚嘅踢法，令球隊近11場作客聯賽10場開出半場和，預期今戰亦唔例外。另外，曼城近八場作客聯賽全部開細，入波一球起、兩球止，甚至互交白卷，可兼顧細盤。