史特加搶Ｗ攻到你雲

猪拉多纳

13/04/2012
文： 蘇斯黑柴

德甲啱啱開完周中快車，今晚又到周五獨腳戲，史特加主場鬥雲達不來梅。兩隊都正為下屆歐霸盃參賽資格努力，不過計近況同陣容完整性，史特加都贏條街，加上主場之利，有力擊退陣容不整嘅疲兵不來梅，推介1.72倍主W。（有線64及204台周六凌晨2時30分直播）


史特加無疑係德甲季尾狀態最勇一隊，近8場聯賽6勝2和保持不敗，包括作客4:4逼和榜首多蒙特嘅經典大戰，鋒線更加銳利無匹，近10場聯賽已經瘋狂轟入29球。正因為佢哋踢法係有前冇後嘅全攻型，現階段根本勒都勒唔住。

不來梅傷疲交併

球隊能夠有飛躍進步，全因波斯尼亞國腳伊比斯域下半季由賀芬咸來投，佢嘅全面踢法同無私精神，同原本各自為戰嘅眾多攻擊手產生化學作用，激活整條鋒線，以佢哋近仗演出，目前德甲冇幾多隊可以抵擋得住。


相反不來梅已經5輪不勝，而且一直受到嚴重傷兵問題困擾，今仗續有普特爾、保路斯基、巴菲迪、肯特、伊基斯同阿拿奧杜域等主力因傷缺陣，左閘保尼斯治上仗被逐要停賽，球隊一直倚賴嘅首席射手比沙路喺傷愈復出後亦無復佳態，已經連續3仗冇貨交，加上3日前火併完慕遜加柏，喺大部分時間踢少個下激戰踢成2比2，體力消耗極大，今晚作客遭遇弗爆對手，恐怕凶多吉少。