紅魔興玩單跳小心贏波輸盤

猪拉多纳

12/04/2012
文： 阿水

阿水身邊唔少老友都係職業賭徒，有人每星期一至五過大海，朝九晚五搏殺當開工；有人全日24小時賭波賭勻全世界，不過佢哋都揸緊一個宗旨，就係賭錢都要賭得有紀律！


所謂紀律，其中最重要係控制情緒，唔好因為間中手風唔順，亂咁追注搞到輸大錢萬劫不復，又或者係一時運氣好就立亂加大注碼場場買，尤其冇精神時要收手休息，心情唔好一樣要忍手，總之要肯定頭腦清晰，每次出擊都要作出最佳決定。

「史多戰」射手「大」鬥法

講番嚟緊周末啲波，周日曼聯主場對阿士東維拉，咪以為「紅魔鬼」喺聯賽8連勝氣勢勁爆，就一定可放膽追上盤，如果係咁就大錯特錯啦，事關睇番佢哋盤路，近排幾乎都係玩單跳，唔係鋪鋪贏o架！今場佢哋讓到1.5/2球，小心贏波輸盤。至於周六上演嘅德甲重頭戲，由史浩克04對多蒙特場波，兩班波都弗真係唔易買，莊家開平手真係幾合理。不過兩班波都係火力強大，魯爾同香川真司都係Fit到漏油，個入球大家陣出面已經賣到1.71倍低水，值得捧場o架！

碧咸傳同隊友不和反銀河

有樣嘢提提大家，呢期美職都開始多人賭，仲有唔少早飛落注，今期個個喺度追洛杉磯銀河反彈添。不過咪話阿水唔提你哋，首席球星碧咸早排傳出同隊友不和，應該係堅料，最近佢仲成日都話有傷唔出得，隊波士氣麻麻咋！今個周日朝早銀河主場對住波特蘭伐木者，計實力就高唔止一線，但考慮埋啲麻煩嘢，反而下盤仲抵博。