漢諾威馬體會「大」鬥法

猪拉多纳

05/04/2012
文： 亨格比利

復活節假期未到，「復活鳥」先陪大家睇波！漢諾威今晚喺歐霸盃8強次回合主場對馬德里體育會，1.72倍入球大最抵捧。兩隊分別有射手強勢翻生，馬美迪奧夫離開曼聯後變咗入球機器，法卡奧就旺到曼城都想斟佢，兩隻「復活鳥」孭飛夠開入球騷。（有線62及202周五凌晨3：05直播）


首回合漢諾威輸1：2，但有作客入球喺手，肯定唔會扯白旗，而且1月由曼聯以150萬鎊超值價加盟嘅塞內加爾射手馬美迪奧夫，可能係德甲冬季轉會市場最佳收購，加盟後上陣12場勁入8球，依家佢大打爭氣波，絕對有條件繼首回合後再次射爆馬體會大門。

馬美迪奧夫鬥法卡奧

另一方面，馬體會陣容嚴重不整，除咗中場阿達杜蘭、基比同桑法蘭托利斯要停賽，中場碧斯同隊長安東尼奧盧比斯又有傷，不過球迷又唔需要擔心佢哋死火，因為中場大腦迪亞高最近已好番，日前喺馬體會主場以3：0炒起基達菲嘅聯賽更加有波入，踢開進攻足球唔似會死守。


仲有呀，上季為波圖贏盡錦標兼且成為歐霸盃神射手嘅法卡奧，季初因為要時間適應唔算特別勁，但近排佢已經回復正常威力，對上7場勁入7球，消息話曼城同車路士都諗住搵佢幫手。難得兩大燒錢球會睇起，除非法卡奧嫌錢腥，否則肯定要騷哥利博轉會，入球大抵玩！


首回合：漢客負1：2

橫數千軍

漢諾威歐戰主場勁

‧歷來歐洲賽主場得5勝2和。

‧連續9戰每場總入球至少3球。

馬體會半場9戰不敗

‧14次訪德球會得4勝3和7負。

‧近9場5次半場領先4次打和。